ལྟ་བའི་གསུང་མགུར་ཟབ་མོ་དགོངས་འགྲེལ་དང་བཅས་པ།
༄༅། ། ལྟ་བའི་གསུང་མགུར་ཨ་མ་ངོས་འཛིན་འདི་ནི་གཞུང་ཆེན་ཞིག་གི་རྩོམ་ལུས་ལྟར་རྩོམ་གཞི་གང་ཡང་རུང་བ་ཞིག་གཞིར་བཞག་སྟེ་དེ་ལ་རྒྱུ་ཆ་མང་པོས་མཐའ་བརྒྱན་ཅིང་ལུང་དང་རིགས་པས་རྒྱས་པར་སྤྲོས་ནས་མཛད་པ་ཞིག་མ་ཡིན་པར། མཛད་པ་པོ་རང་ཉིད་ཀྱི་ཐུགས་མཁྱེན་པའི་ཀློང་ལ་གང་ཞིག་མངའ་བའི་བདེ་སྟོང་གི་ཡེ་ཤེས་སམ་སྟོང་པ་རྟེན་འབྲེལ་གྱི་དོན་རྣམས་འགགས་མེད་གསུང་གི་དབྱངས་རྟར་དྲངས་ཏེ་ཐོལ་བྱུང་དུ་གསུངས་པ་ཡིན་པས་ན་ལྟ་བའི་གནད་ཀུན་རྗེན་ནེར་སྟོན་པའི་ཁྱད་ཆོས་འབུར་དུ་ཐོན་ཡོད།
གཞུང་འདིའི་འགྲེལ་པ་ཁག་ལ་མཚོན་ན། ཀུན་མཁྱེན་འཇིགས་མེད་དབང་པོ་དང་༧གོང་ས་བཅུ་བཞི་པ་ཆེན་པོ་རྣམ་གཉིས་ཀྱིས་གཙོ་བོ་མདོ་ལུགས་རྐྱང་པར་སྦྱར་ཏེ་གོ་བདེ་བར་བཀྲལ་ཞིང་། ཁྲི་ཆེན་བསྟན་པ་རབ་རྒྱས་མཆོག་གིས་ལྟ་མགུར་འདིའི་མཐར་ཐུག་གི་དགོངས་པ་གསང་བ་སྔགས་ཀྱི་ལུགས་སུ་ཉུང་ངུའི་ཚིག་གིས་བཀྲལ་ཡོད་སྟབས། དཔེ་དེབ་འདི་ནི་སྐལ་བ་དང་ལྡན་པའི་ཀློག་པ་པོ་དག་ལ་མདོ་སྔགས་གཉིས་ཆ་ནས་ལྟ་བའི་ཟབ་ཁྱད་གསལ་ལེར་སྟོན་པའི་ཤེལ་གྱི་མེ་ལོང་གཡའ་དག་ཅིག་ཏུ་གྲུབ་ཡོད།།
ངེས་དོན་རྒྱ་མཚོས།
